كلي شراح اكلك وانت راح تروح
وليش اتلح عليه وتنتظــــر ردّي
هذا السان حالي دموعي تحجي وياك
وراح اسكت واحجي ادموعي البخدّي
واسولف بالدمع واتوسلك عبرات
... اود اشبع بشوفك واحتفــــــل ودّي
ضل وياي اريدك والبقن جم يوم
وهل جم يوم صارن حدك وحدّي
خليني ارد اشوفك كَمت احسك طيف
وياعين التكض الطيف اليعـــــدّي
صرفنه اسنين حبنه وخلصن تبذير
وعلى يوم النشوفك باجر انجــدّي
اخذني وياك اريدك مااريد الغير
وكون ابسدك اكَعد واكَعد ابسدّي
لتخليني وحدي منين اعرف الناس
لااكَدر اعاشر لا خلكَ عنـــــدي
احب اشلون غيرك من اود اشلون
وانه وياك كلش خلّصـــت ودي
ابكَد حبك النفسك جنت اناني وياك
ومنو ابكَدي يحبك محد ابـــكَدي
يل بيه ويه روحي الطلعه طلعت موت
شيردكم علي لو صيحــت ردّي
اخذني وياك مني اشعندي باقي وياي
وكلي وياك اخذني وكلشي لتودي
شيصيرن بعد خل اليصير ايصير
خل كلشي الأليه وينكَلب ضــدي
خل اسنيني تغركَ خلي عمري يفيض
خل اكَبال عيني وينهدم ســـــدي
خايف صح جنت بس جنت اخاف عليك
والمن بعدك انته وخايف اشعندي
موضوع: غراميات 2013